Prokuroria ka sekuestruar kartelën mjekësore të 32-vjeçarit Lear Kurti, i cili ndërroi jetë në duart e efektivëve të Policisë së Shtetit.
Në ditën e shtatë pas vdekjes së të riut, hetimet vijojnë ende dhe me sekuestrimin e kartelës së Kurtit, synohet të zbardhen detaje nga gjendja shëndetësore e të ndjerit.
Gjithashtu, janë marrë në pyetje edhe mjekët e spitalit të Traumës që kanë qenë në turn mbrëmjen e 19 tetorit, kohë kur dhe u është dërguar Kurti nga efektivët e policisë.
17 punonjës të Policisë së Shtetit janë rimarrë gjithashtu në pyetje pasi dyshohet se janë përfshirë në veprime për ndalimin e Lear Kurtit. Deri më tani, nga të dhënat e administruara nuk rezulton se Lear Kurti të vuante nga epilepsia, pista e parë e deklaruar nga autoritetet.
Gjithsesi, pritet ende rezultati përfundimtar i të gjitha hetimeve për të dalë në një konkluzion.
